सावर्डे येथील सह्याद्री शिक्षण संस्था संचलित गोविंदराव निकम माध्यमिक व उच्च माध्यमिक विद्यालयात दिनांक २७ फेब्रुवारी २०२६ रोजी मराठी भाषा गौरव दिन मोठ्या उत्साहात व अभिमानाच्या वातावरणात संपन्न झाला. मराठी साहित्यातील महान कवी, नाटककार आणि ज्ञानपीठ पुरस्कार विजेते वि. वा. शिरवाडकर (कुसुमाग्रज) यांच्या जयंतीनिमित्त हा दिवस साजरा करण्यात आला.
कार्यक्रमाची सुरुवात विद्यालयाचे उपप्राचार्य विजय चव्हाण यांच्या शुभहस्ते कुसुमाग्रज यांच्या प्रतिमेला पुष्पहार अर्पण करून करण्यात आली. यावेळी विद्यालयाचे प्राचार्य राजेंद्र वारे, सर्व शिक्षकवृंद, विद्यार्थी व शिक्षकेतर कर्मचारी मोठ्या संख्येने उपस्थित होते.
विद्यार्थ्यांचे मनोगत
विद्यार्थी प्रतिनिधींनी आपल्या प्रभावी मनोगतातून मराठी भाषेचा इतिहास, तिची थोरवी, तसेच जागतिक पातळीवरील मराठीचे स्थान यावर प्रकाश टाकला.
कु. सिद्धी इंगळे, श्रावणी राठोड, युवराज रसाळ व स्वरांगी पाटील यांनी आपल्या भाषणातून मराठी भाषेचा अभिमान व्यक्त केला.
शिक्षकांचे मार्गदर्शन
मराठी विभाग प्रमुख योगेश नाचणकर यांनी मराठी भाषेचे संवर्धन, भाषा वृद्धी आणि विद्यार्थ्यांनी भाषेप्रती जपावी अशी आस्था याविषयी सखोल विचार मांडले.
अध्यक्षीय भाषणात उपप्राचार्य विजय चव्हाण यांनी मराठी भाषेमध्ये करिअरच्या विविध संधी, दैनंदिन जीवनात मराठीचा अधिकाधिक वापर आणि भाषेच्या जतनासाठी सर्वांनी प्रयत्न करण्याचे महत्त्व अधोरेखित केले.
आभार प्रदर्शन व भित्तीपत्रक उद्घाटन
कार्यक्रमाच्या शेवटी ज्येष्ठ मराठी शिक्षक भानुदास चव्हाण यांनी आपल्या ओघवत्या शैलीत आभार प्रदर्शन केले.
कार्यक्रमानिमित्त मराठी भाषेच्या गौरवार्थ सुंदर भित्तीपत्रक तयार करण्यात आले. या भित्तीपत्रकाचे उद्घाटन ज्युनिअर कॉलेजचे प्राध्यापक हनुमंत घाडगे यांच्या हस्ते संपन्न झाले.
सूत्रसंचालन व नियोजन
कार्यक्रमाचे सूत्रसंचालन सौ. जाधव एस. व्ही. यांनी प्रभावीरीत्या केले.
या कार्यक्रमाचे सुयोग्य नियोजन मराठी विषयाचे सर्व शिक्षक — श्री. नाचणकर वाय. सी., श्री. चव्हाण बी. ए., सौ. बागवे ए. जी., सौ. जाधव एस. व्ही., सौ. निकम जे. पी., सौ. बागवे एस. एस. व सौ. श्रद्धा सावर्डेकर — यांनी केले.
मराठी भाषेचा गौरव, तिचे जतन व संवर्धन यासाठी अशा उपक्रमांमुळे विद्यार्थ्यांमध्ये भाषेप्रती अभिमान व आत्मीयता निर्माण होते, असे मत उपस्थितांनी व्यक्त केले.
