संगमेश्वर तालुक्यातील फणसट गावची सुकन्या अर्शिन अस्लम धामस्कर हिने दंतवैद्य (BDS) पदवी मिळवून संपूर्ण गावाचा मान उंचावला आहे. तिच्या या यशामुळे फणसट गावासह तालुक्यातील नागरिकांमध्ये आनंदाचे वातावरण निर्माण झाले आहे.
डॉ. अर्शिन हिने वैदिक डेंटल कॉलेज अँड रिसर्च सेंटर, दमण येथून ही प्रतिष्ठित दंतवैद्य पदवी प्राप्त केली आहे. या कठोर शिक्षण प्रक्रियेतून तिने अत्यंत मेहनत, जिद्द आणि चिकाटीच्या बळावर यश मिळवले. तिच्या या यशाचे कौतुक गावकऱ्यांसह शिक्षकवर्ग आणि मित्रपरिवार करत आहेत.
डॉ. अर्शिन धामस्कर हिने दहावीपर्यंतचे शिक्षण अरुंधती पाध्ये इंग्लिश मिडियम स्कूल, देवरुख येथे पूर्ण केले, तर बारावी (विज्ञान शाखा) शिक्षण कै. मिनाताई ठाकरे विद्यालय, देवरुख येथे घेतले आहे. लहानपणापासूनच वैद्यकीय क्षेत्रात करिअर करण्याची तिची इच्छा होती, आणि सातत्यपूर्ण प्रयत्नांमुळे आज ती स्वप्न पूर्ण करण्यात यशस्वी झाली आहे.
तिच्या या यशाबद्दल फणसट गावासह संपूर्ण संगमेश्वर तालुक्यातून अभिनंदनाचा वर्षाव होत आहे. समाजातील अनेकांनी तिच्या यशाला “प्रेरणादायी उदाहरण” असे संबोधले आहे. गावात तिच्या कुटुंबीयांच्या घरी आनंदाचे वातावरण असून, नातेवाईक, मित्र आणि नागरिकांकडून शुभेच्छांचा वर्षाव होत आहे.
डॉ. अर्शिन धामस्कर हिचे हे यश मेहनत, चिकाटी आणि समर्पणाचे उत्तम उदाहरण असून, ती तरुणांसाठी प्रेरणादायी ठरत आहे.