🟣कोकण रेल्वेमध्ये स्लीपर कोचचे तिकीट काढल्यामुळे दिवसा झोपण्यासाठी इतर प्रवाशांवर दादागिरी

🔸 दादागिरी करणाऱ्यांवर कार्यवाही करा : शौकतभाई मुकादम
चिपळूणः कोकण रेल्वेमध्ये स्लीपर कोचचे तिकीट काढल्यावर प्रवासी रात्री दहा ते सकाळी सहा पर्यंत झोपू

शकतात असा रेल्वेचा नियम आहे, परंतु प्रवाशी स्लीपर कोचचे तिकीट आम्ही झोपून जाण्यासाठीच काढले आहे असे अरेरावीने सांगतात, त्यामुळे इतर प्रवाशांची गैरसोय होत आहे. दिवसा मधील सीट झोपण्यासाठी ठेवल्याने खालच्या सीटवर बसणाऱ्या माणसाला खाली मान घालून बसावे लागते, शिवाय जेवण सुद्धा खाली मान घालून करावे लागते. प्रवाशी ऐकत नाहीत टि. सी देखील त्यांना काही सांगत नाहीत. स्लीपर कोचमध्ये एका बाजुला तीन सीट नंबर असतात. ते रात्रीच्या वेळी झोपण्यासाठी तीन प्रवाशांना तीन स्लीपर व त्यातील तीन प्रवाशांना दिवसा बसण्यासाठी एकच लोअर स्लीपर वापरायचा असतो असा रेल्वेचा नियम आहे.

विशेष म्हणजे रात्री १० ते सकाळी ६ वाजेपर्यंत प्रत्येकाला आपली सीट झोपण्यासाठी वापरता येते. मात्र नंतर तीनही प्रवाशांनी एकाच लोअर स्लीपर सीटवर बसायचे असते परंतु झोपायचे नसते असा देखील रेल्वेचा नियम आहे. काही प्रवाशी आर.पी.एफ पोलीसांकडे ऑनलाईन तक्रार करतात, परंतु पोलीस व टि.सी त्याची दखल घेत नाहीत. अशा अनेक रेल्वे प्रवाशांची तक्रार आपल्याकडे आली आहे, असे कोकण रेल्वे अन्याय निवारण समितीचे अध्यक्ष शौकतभाई मुकादम यांनी म्हटले आहे.

तरी रेल्वे प्रवाशांनी नियमामध्ये रेल्वे प्रवास करावा. सद्या प्रवास करताना प्रवाशांमध्ये भांडण होत आहेत. काही प्रवासी चुकीचे वागत असतील तर टि.सी.ने त्यांच्यावर कार्यवाही करावी. काही प्रवासी दादागिरी करत असतील तर, टि.सी. ने आर.पी.एफ पोलीसांना कळवावे. जास्त दादागिरी कोकणाच्या बाहेरचे प्रवासी करीत आहेत असे निर्देशनास आले आहे. तरी रेल्वे प्रशासनाने ताबडतोब यामध्ये लक्ष घालून कोकणातील होणाऱ्या प्रवाशांवरचा अन्याय दुर करावा अशी मागणी कोकण रेल्वे अन्याय निवारण समितीचे अध्यक्ष शौकतभाई मुकादम यांनी रेल्वे प्रशासनाकडे केली आहे.