तुमचे महाराज पळून गेले होते.”; इंद्रजित सावंतांना धमकी देताना शिवरायांबद्दल संतापजनक वक्तव्य!

इंद्रजीत सावंत यांना आलेल्या धमकीनंतर, त्यांनी पत्रकार परिषद घेऊन या प्रकरणावर अधिक माहिती दिली आहे. धमकी देणाऱ्या व्यक्तीने छत्रपती शिवाजी महाराज यांच्याबद्दल अत्यंत वादग्रस्त आणि अवमानकारक वक्तव्ये केली असल्याचा आरोप सावंत यांनी केला आहे. या वक्तव्यांमुळे महाराष्ट्राच्या राजकीय आणि सामाजिक वर्तुळात तीव्र प्रतिक्रिया उमटल्या आहेत.*

*इंद्रजीत सावंत यांनी पत्रकार परिषदेत बोलताना सांगितले की, त्यांना धमक्या नवीन नाहीत, परंतु या धमकीमध्ये छत्रपती शिवाजी महाराजां बद्दल जे विचार व्यक्त करण्यात आले आहेत, ते अत्यंत घृणास्पद आहेत. हे विचार समाजात उघड होणे आवश्यक आहे, या उद्देशानेच त्यांनी धमकीचे कॉल रेकॉर्डिंग सार्वजनिक केल्याचे स्पष्ट केले. या प्रकरणावर गृहमंत्री देवेंद्र फडणवीस काय भूमिका घेणार, असा सवालही त्यांनी उपस्थित केला. धमकी देणाऱ्या व्यक्तीचे फोटो भगतसिंह कोश्यारी यांच्यासोबत असल्याचे त्यांनी निदर्शनास आणून दिले, यावरून धमकी देणाऱ्या व्यक्तीच्या विचारसरणीचा अंदाज येतो, असे सावंत म्हणाले.

सावंत यांनी सांगितले की, धमकी देणाऱ्या व्यक्तीने कॉल रेकॉर्डिंगमध्ये छत्रपती शिवाजी महाराजांबद्दल अनेक आक्षेपार्ह वक्तव्य केलं. ‘शिवाजी महाराज पळून गेले होते, बाजीप्रभु देशपांडे यांच्यामुळे ते वाचले,’ असे वादग्रस्त विधान धमकी देणाऱ्याने केले. याशिवाय, ‘ब्राह्मणांची ताकद कमी समजू नका’ आणि ‘ब्राह्मणांच्या मुख्यमंत्र्यांच्या शासनात काम करत आहात’ अशा धमक्याही देण्यात आल्या. समर्थ रामदास स्वामी नसते तर शिवाजी महाराज नसते, अशी विचारसरणी धमकी देणाऱ्या व्यक्तीची असल्याचे सावंत यांनी पत्रकार परिषदेत सांगितले.

धमकीमध्ये छत्रपती शिवाजी महाराजांबद्दल केलेल्या अवमानकारक वक्तव्यांवर सर्व स्तरांतून तीव्र प्रतिक्रिया येत आहेत. इतिहास अभ्यासक आणि शिवप्रेमी संघटनांनी या वक्तव्यांचा निषेध केला असून, धमकी देणाऱ्या व्यक्तीवर कठोर कारवाई करण्याची मागणी केली आहे. राजकीय नेत्यांनीही या प्रकरणाची गांभीर्याने दखल घेतली असून, या प्रकरणाच्या मुळाशी जाऊन सत्य समोर आणण्याची गरज व्यक्त केली आहे.

या धमकी प्रकरणाने समाजात एक नवीन वाद निर्माण केला असून, या प्रकरणाचा तपास पोलीस कोणत्या दिशेने करतात, हे पाहणे महत्वाचे ठरणार आहे. इंद्रजीत सावंत यांनी मात्र या धमक्यांबाबत आपली भूमिका अधिक स्पष्टपणे मांडली आहे, आणि छत्रपती शिवाजी महाराजां बद्दल चुकीचे बोलणाऱ्यांविरुद्ध ते आवाज उठवत राहणार असल्याचे त्यांनी ठामपणे सांगितले आहे.