प्राथमिक शाळा खेर्डी चिंचघरी सती येथे गुरुजनांचा गौरव – शिक्षक दिन उत्साहात संपन्न
प्राथमिक शाळा खेर्डी चिंचघरी (सती) येथे शिक्षक दिन मोठ्या उत्साहात व आनंदी वातावरणात साजरा करण्यात आला. भारताचे माजी राष्ट्रपती, महान तत्त्वज्ञ व शिक्षणतज्ज्ञ डॉ. सर्वपल्ली राधाकृष्णन यांच्या जयंतीनिमित्त हा दिवस शिक्षक दिन म्हणून साजरा केला जातो.कार्यक्रमाची सुरुवात डॉ. सर्वपल्ली राधाकृष्णन यांच्या प्रतिमेचे पूजन व दीपप्रज्वलन करून करण्यात आली. यानंतर शाळेतील सर्व शिक्षकवृंदांचा भेटवस्तू व पुष्प देवून शाळेचे मुख्याध्यापक श्री. अरविंद सकपाळ सर यांच्या हस्ते शिक्षकांचा गौरव करण्यात आला.यावेळी विनया नटे यांनी शिक्षक दिनाचे महत्त्व सांगताना डॉ. सर्वपल्ली राधाकृष्णन यांच्या शैक्षणिक कार्याची व त्यांच्या जीवनकार्याची माहिती विद्यार्थ्यांना दिली. विद्यार्थ्यांच्या जीवनात शिक्षकांचे असलेले अनन्यसाधारण महत्त्व त्यांनी आपल्या मनोगतातून विशद केले.तसेच कु . अनया लांबे हिने शिक्षक दिनाचे महत्त्व प्रभावी शब्दांत सांगून गुरुजनांप्रती कृतज्ञता व्यक्त केली. शाळेतील सर्व विद्यार्थी व शालेय मंत्रिमंडळातील सर्व विद्यार्थ्यांनी कार्यक्रमात उत्स्फूर्त सहभाग घेतला.
विद्यार्थ्यांनी आपल्या गुरुजनांना शुभेच्छा देऊन त्यांच्याप्रती आदर व कृतज्ञता व्यक्त केली. सर्व शिक्षक, विद्यार्थी व शालेय मंत्रिमंडळाच्या उत्स्फूर्त सहभागामुळे शिक्षक दिनाचा हा सोहळा अत्यंत आनंदी व उत्साहपूर्ण वातावरणात संपन्न झाला.या कार्यक्रमाचे आयोजन शाळेच्या ज्येष्ठ शिक्षिका मनीषा कांबळे यांनी केले .