टोरेस घोटाळा प्रकरणात आर्थिक गुन्हे शाखेने सोमवारी आरोपपत्र दाखल केले आहे. आठ आरोपींविरोधात २७ हजार १४७ पानांचे सत्र न्यायालयात आरोपपत्र दाखल केले. याप्रकरणात आतापर्यंत १४ हजार १५७ गुंतणूकदार आर्थिक गुन्हे शाखेकडे आले आहेत. तर यातील फसवणुकीचा आकडा १४२ कोटी ५८ लाख रुपये इतका आहे.*
आर्थिक गुन्हे शाखेने याप्रकरणी मे. प्लाटिनम हेर्न प्रा.लि, व्हेलेन्टिना गणेश कुमार, तानिया ऊर्फ टॅझगुल झॅस्टोव्हा, सर्वेश सुर्वे, अल्पेश खारा, तौसिफ रियाझ, अर्मेन ॲटीयन व लल्लन सिंह या आठ आरोपींविरोधात विशेष एमपीआयडी न्यायालयात आरोपपत्र दाखल केले आहे.
तर पोलिसांनी संशयित सूत्रधार ओलेना स्टोइयान, व्हिक्टोरिया कोव्हालेन्को, ओलेक्झांड्रा त्रेडोखिब, आर्टेम ओलिफरचुकमुस्तफा कराकोच, ओलेक्झांडर बोराविक, ओलेक्झांडर झापिचेंको, ओलेक्झांड्रा ब्रुंकीव्स्का आणि इयुर्चेंको यांच्या विरोधात ब्लू कॉर्नर नोटिस जारी केली आहे.
३५ कोटींची मालमत्ता जप्त
मौल्यवान आर्थिक गुन्हे शाखेने टोरेस प्रकरणात आतापर्यंत ३५ कोटी रुपयांची मालमत्ता जप्त केली आहे. तसेच टोरेस कंपनीशी संबंधित फर्निचर, विद्युत उपकरणे, सात ते आठ मोटरगाड्या यांचा लिलाव करण्याबाबत एमपीआयडी न्यायालयाकडे परवानगी मागण्यात आली आहे. तर दीड कोटी रुपयांच्या मौल्यवान खड्यांची पुन्हा विक्री करण्याबाबतची परवानगीही पोलिसांनी न्यायालयाकडे मागितली होती. याप्रकरणी ईडीही तपास करत असून जयपूर व मुंबईतील १३ ठिकाणी छापे टाकून काही कागदपत्रे, डिजिटल पुरावे जप्त करण्यात आले आहेत.
मुंबईतील हजारो गुंतवणूकदारांचे कोट्यावधींचे नुकसान
मुंबई, नवी मुंबई, ठाणे आणि मीरा-भाईंदर या भागांतील हजारो गुंतवणूकदारांचे याप्रकरणात कोट्यावधींचे नुकसान झाले आहे. या प्रकरणात आरोपी असलेले युक्रेनमधील आठ नागरिक आणि तुर्कस्तानमधील एक नागरिक सध्या फरार आहेत. टोरेस प्रकरणातील मुख्य सूत्रधाराने गैरव्यवहारातील २०० कोटी रुपये परदेशात पाठवल्याचा संशय आहे.